SUID-KAAP NUUS - Evergreens, die verdedigende klubkampioen van die SWD, kan tevrede voel met hul volpunte oorwinning van 29-17 oor die gedugte span van die Silver Stars in die Rosemoor-sportterrein.
Rustyd was die wenspan reeds met 17-10 voor.
Dit was 'n opwindende wedstryd wat by tye warm geraak het met humeure wat telkens oorgekook het. Albei spanne was bereid om die bal die werk te laat doen en beide spanne moes hul keer ken.
Die wedstryd was weereens 'n bewys dat klubrugby in die SWD kerngesond is en dat die gaping tussen spanne nie so groot is nie.
Vir Evergreens het Anvor Prins (loskopstut), Byron November (haker) en Anston Barnardo (vaskopstut) voorlangs stewig vertoon in die skrums en ook hul kant in die losspel gebring. Die groot uitblinker was egter die jong slot Pieter-Jan le Roux wat uitgetroon het in alle fasette van die wedstryd. 'n Blink toekoms lê vir hom voor as hy deurlopend hard werk.
Agter die skrum het Elroy Louis (skrumskakel) gekook. Hy het 2 pragdrieë gedruk.
Silver Stars se gevaarmanne was hul senterpaar, Ashwin Scott en Rodwill Williams, en Rustdean Solomons (linkervleuel) wat altyd gevaarlik was met die bal in die hand. Richardo Jansen (agtsteman) het ook 'n barshou gespeel.
Evergreens se ander drieë is deur Jason Horne (heelagter) en Marshell Abrahams (plaasvervanger-flank) gedruk. C-Than Moos (losskakel) slaag met 3 doelskoppe en 'n strafdoel.
Vir die tuisspan is Solomons en Raynaldo Baardman (flank) oor vir drieë. Neillin Scott (heelagter) slaag met 2 doelskoppe en 'n strafdoel.
Evergreens se tweede en derde spanne het ook onderskeidelik met 14-8 en 22-5 geseëvier. Vir die wenspan se tweedes is Ruwahn Bredenkamp (regtervleuel) en Michael Damon (haker) oor vir drieë. Grant Hoogbaard (agtsteman) en Eugene Henecke (losskakel) slaag elk met 'n doelskop. Vir die verloorspan het Chester Olivier (buitesenter) gaan druk. Couhan Grondkoning (vaskopstut) slaag met 'n strafskop.
Ruzane Abrahams (agtsteman, 2), Luadell Ceaser (skrumskakel) en Ryno Michaels (plaasvervanger-senter) is vir Evergreens se derde span oor vir drieë. Elroy Stalmeester (losskakel) slaag met 'n doelskop. Vir die tuisspan is Julian Stalmeester (flank) oor vir 'n drie.
Crusaders het op die Parkdene-sportterrein sy buurman, Progress, in 'n naelbytstryd met 9-8 verras. Elton Tarentaal het die besoekers met 3 strafdoele gesink.
Patrick Brinkhuys het vir Progress gaan druk. Jade Roelfse slaag met 'n strafdoel.
Progress se tweede span het met 16-11 gewen. W Claassen en C Johnson het gaan druk. B. Blom slaag met 'n strafdoel en J Fredericks met 'n skepdoel.
Crusaders se derde span was met 17-14 baas. Eldeno Botha (2) en William Frans is oor vir drieë. Ruan Frans slaag met 'n doelskop. Vir Progress is B Williams en C Ruiters oor vir drieë. Y Holtman slaag met 2 doelskoppe.
NMMU is ná vier agtereenvolgende nederlae weer terug op die wenpad. Hulle het die gedugte Blanco op hul tuisveld met 'n volpunte oorwinning van 45-34 geskok.
Die wenspan se ander drieë is gedruk deur Creswin Josephs (buitesenter, 2) en Nathan Gogela (haker). Christian Willemse (losskakel) slaag met 3 doelskoppe en 'n strafdoel.
Groot-Brakrivier se vurige slot, Marquin Smart, het die vonk verskaf in hul oorwinning van 10-5 oor die gedugte span van Barbarians op die D'Almeida-sportterrein.
Groot-Brakrivier is met 17 punte en 'n punteverskil van (+36) tweede op die punteleer. Smart was aangewys as speler van die wedstryd en het 'n barshou gespeel.
Anwil van Wyk (senter) het die wenspan se enigste drie gedruk. Deroy Rhode (skrumskakel) slaag met 'n doelskop en 'n strafdoel. Vir die verloorspan is Winston Seconds (agtsteman) oor vir 'n drie.
Barbarrians se tweede span het met 22-18 gewen. Kervin Taute (heelagter, 2), Logan Hendricks (linkervleuel) en Dillon Afrika (plaasvervanger-flank) is oor vir drieë vir die wenspan. Macdillen Saayman (losskakel) slaag met 'n doelskop. Bradley Sumaro (flank) is aangewys as speler van die wedstryd.
Groot-Brakrivier se derde span het met 26-8 gewen. Shadnon Jacobs, Bramwill Abrahams en Bennie van Vuuren (2) het gaan druk. Jacobs slaag ook met 3 doelskoppe. Vir Barbarians is Emile Moolman oor vir 'n drie. Lohane Kiewiet slaag met 'n skepdoel.
Bridgton het die nuweling in die kompetisie, Swellendam, met 17-11 geklop. Herschelle America (linkervleuel) en Bradwin Wanies (heelagter) het vir die wenspan gaan druk. Adrian Booysen (losskakel) slaag met 2 doelskoppe en 'n strafdoel.
Jolin Matthysen (slot) het Swellendam se enigste drie gedruk. Roger van Wyk slaag met 2 strafdoele.
Bridgton se tweede en derde span het ook met 35-31 en 20-10 gewen. Kurt Rhode (regtervleuel), Charlston Ewerts (linkervleuel), Andre Fielies (agtsteman) Alteano Matolla (flank) en Ruahl Lewis (slot) het vir Bridgton se tweede span gaan druk. Lavano Nathan (skrumskakel) slaag met 'n doel en 2 strafdoele en Brian Jonathan (plaasvervanger) met 'n doelskop.
Vir die wenspan se derde span is Chrizano Julius (linkervleuel, 2), Abraham de Laan (flank) en Altheano Matolla (haker) oor vir drieë.
Rodwill Williams van Silver Stars (met bal) in snelrat met Byron November (links).
Klubrugbyuitslae
Die uitslae ná die afgelope naweek se klubrugby in die SWD Premierliga is:
Eerste spanne:
Crusaders 9, Progress 8; NMMU 45, Blanco 34; Bridgton 17, Swellendam 11; Evergreens 29, Silver Stars 17; Groot-Brakrivier 10, Barbarians 5.
Tweede spanne:
Progress 16, Crusaders 6; Blanco 11, NMMU 10; Bridgton 35, Swellendam 31; Evergreens 14, Silver Stars 8; Barbarians 22, Groot-Brakrivier 18.
Derde spanne:
Crusaders 17, Progress 14; Blanco 55, NMMU 11; Bridgton 20, Swellendam 10; Evergreens 22, Silver Stars 5; Groot-Brakrivier 26, Barbarians 8.
FOTO'S: HUGO REDELINGHUYS & JAN VENTER
'Ons bring jou die nuutste Tuinroete, Klein Karoo, Hessequa nuus'
