SUID-KAAP NUUS - Die hoofafrigter van die SWD Arende Amateurspan, Ronzio Merrington (39), was een van die agt bewaarders wat Dinsdagoggend (5 Mei) in 'n grusame ongeluk op die N2-snelweg naby Swellendam dood is.
Sy kollega en die enigste oorlewende in die minibus waarin hulle gery het, Ezona Mert wat swanger is, het wonderbaarlik slegs geringe beserings opgedoen en is reeds uit die hospitaal ontslaan.
Sewe van die bewaarders het op die toneel gesterf en twee, waaronder Mert, is per ambulans na die Swellendam-hospitaal geneem, waar nog een van haar kollegas, 'n vrou, aan haar beserings beswyk het.
Die oorledenes is Joseph Klaasse (49), Sydwell Johnson (40), Neville Jansen (49), Josephine Gertze (52), Frederick Carstens (53), Bunit Brand (42) en Dawie Arries (41). Almal is van Swellendam.
Die ongeluk het tussen 06:00 en 07:00 by die ingang na die plaas, Appelsbos plaasgevind.
Volgens adjudant-offisier Alroy Windvogel, polisiewoordvoerder van Heidelberg-polisie, het 'n vragmotor van agter teen 'n bakkie gebots toe dié vir aankomende verkeer gewag het om by die plaasingang in te draai.
"Op daardie oomblik het 'n minibus met nege bewaarders daarin van die teenoorgestelde rigting gekom en was ook in die botsing betrokke.
"Hulle was onderweg na die korrektiewe
dienste op Buffeljagsrivier om vir diens aan te meld," verduidelik Windvogel.
Die wrak van die minibus en stukke metaal het oor die toneel verspreid gelê. Die verkeer was vir etlike ure ontwrig met slegs een baan wat gebruik kon word tot opruimingswerk voltooi is.
Die bestuurder van die bakkie is ongedeerd, maar twee van sy werkers is beseer. Die vragmotorbestuurder is ook beseer en is steeds in die hospitaal. Laasgenoemde was vanaf Port Elizabeth na Kaapstad onderweg." 'n Saak van strafbare manslag word ondersoek.
Hennie Baartman, president van die SWD-rugbyunie het gister gesê Merrington se dood is 'n groot slag en verlies.
"Hy het die span tot groot hoogtes gelei en elke jaar gesorg dat hulle in die finaal is. Sy gewilligheid om skole en klubs gratis in die Langebergstreek in sy vrye tyd by te staan met afrigting sal ons altyd by bly. Hy was 'n steunpilaar," het Baartman gesê.
'n Tragiese toneel het buite Swellendam op verbygaande motoriste gewag. Foto: Heinrich Fortuin, korrespondent.
Ronzio Merrington, was die afgelope vier jaar die hoofafrigter van die SWD Arende Amateurspan.
'Ons bring jou die nuutste Tuinroete, Klein-Karoo, Hessequa nuus'
