SUID-KAAP NUUS - Johnnie Campher, sekerlik die Suid-Kaap se mees gewilde komediant, is na 'n lang afwesigheid terug op die verhoog met iets wat hy die beste kan doen - om mense met sy vlymskerp humor te laat lag.
Hierdie grapjas se teenwoordigheid op die verhoog is beslis gemis en sy terugkeer word deur sy aanhangers verwelkom.
Wat die lang wag veral die moeite werd maak, is die feit dat hy terug is met 'n splinternuwe produksie wat binnekort by die Garden Route Casino se Bravo Lounge en die Oakhurst Insurance George Arts Theatre te sien sal wees. En net soos sy vorige komedietreffers, beloof dié een ook om hoogs vermaaklik te wees. Met 'n
titel soos Politrix Kurup kan almal hulle klaarmaak vir hope kwinkslae.
Dit het Johnnie vier jaar geneem om aan die stuk te werk. Die materiaal en stories is oral
rondom hom. Die komedie bied 'n satiriese blik op ons samelewing.
In hierdie komedie is Johnnie hipersnaaks.
Hierdie grapmaker het 'n verstommende vermoë om die simpelste situasie lagwekkend te maak en mense spottenderwys uit te beeld. Niks of niemand word gespaar nie, selfs politici loop deur en sommer hard ook. Hoe dan anders, aangesien hulle dikwels die koddigste karakters is. Van die begin tot einde van die produksie is daar nie 'n vervelige oomblik nie. Elke aksie of sêding sal 'n glimlag of lagbui uitlok.
Johnnie Campher het die kuns van komedie vervolmaak. Hy het sy eie klas van humor en dit doen hy met styl. Anders as ander komediante wat net op die verhoog staan en probeer snaaks wees, is dit vir Johnnie die mees natuurlike ding om te doen. Hy is die koddigheid self.
Sy jare as akteur kom goed te pas, aangesien hy immers 32 jaar in die vermaaklikheidsbedryf werk. Wat dit so interessant maak is dat jy niks weet wat Johnnie volgende sal optower nie. Die verras-singselement bly sy troefkaart.
Wat Johnnie so 'n uitsonderlike verhoogkunstenaar maak, is sy energie en kreatiwiteit, asook sy vermoë om verskillende karakters uit te beeld, soms tot drie karakters op 'n slag. Dit is sy ewe bekende handelsmerk en dit werk elke keer.
Johnnie Campher se Politirx Kurup sal op 28 & 29 September, om 20:00, by die Garden Route Casino se Bravo Lounge te siene wees en 30 September om 19:30 by die George Arts Theatre.
Kaartjies vir die Bravo Lounge-vertoning kos R100 en is beskikbaar deur Computicket. Die kaartjies vir die George-vertoning kan by Thurston Amsterdam, op 082 407 6888, bespreek word.
Vir meer inliting, skakel 044 606 7777.
'Ons bring jou die nuutste Tuinroete, Klein-Karoo, Hessequa nuus'
