SUID-KAAP SAKENUUS - Die wyse waarop Mosselbaai bestuur word boesem vertroue by eiendomsbeleggers en huiskopers in en is een van die redes waarom 'n oplewing in die eiendomsbedryf beleef word.
Met behoorlike infrastruktuur, goeie mediese fasiliteite en investeringsinisiatiewe bied Mosselbaai-beleggers 'n wye keuse.
Dit is die mening van Okkie en Deon Terblanche, prinsipale van Terblanche Eiendomme, wat kantore in Mosselbaai, Groot-Brakrivier en nou ook Albertinia bedryf.
"Hoewel die rentekoerse onlangs effe gestyg het en selfs 'n verdere rentekoersaanpassing voor die einde van die jaar verwag kan word, speel verskeie ander faktore 'n rol in die goeie markomgewing waarin eiendomme tans verhandel," sê Deon, wat ook die voorsitter van die Mosselbaai Besigheidskamer is.
Okkie, daarenteen, fokus meerendeels op die plaasmark en sê dat veral leefstylplase steeds goed verkoop. In teenstelling is die aanvraag vir groter kommersiële plase nie so groot nie.
Selfs in die leefstylplaasmark is die voorraad beperk en die aanvraag oorskry die aanbod.
"Dit wil voorkom asof banke meer geredelik finansiering aan veral salaristrekkers met 'n goeie kredietrekord voorsien, hoewel dit steeds vir
entrepreneurs 'n uitdaging is om huislenings te bekom," meen Deon.
"Die twee vernaamste bateklasse waarin beleggers by voorkeur belê is grotendeels aandele en eiendomme. Wanneer die mark soos nou 'n insinking op die aandelebeurs verwag weens internasionale verwikkelinge in veral China, maar ook Europa en die VSA, word eiendomme as belegging baie aanloklik. Boonop is aftreebeleggers lief om in die Mosselbaai-omgewing en veral in Hartenbos te vestig, daarom dalk dat die eiendomsmark in Mosselbaai goed vertoon.
Sedert 2010 het die eiendomsmark in Mosselbaai volgehou gegroei en het in 2011 en 2012 veral baie goed vertoon.
Huurmark
'n Aspek waar talle uitdagings beleef word, is die huurmark waar huise wat vir jong gesinne aanloklik is, net al hoe skaarser word. Die tekort in huise sal noodwendig verdigting oor tyd moet meebring.
Die onder-aanbod in die huurmark kan ook die gevolg van 'n sterk vakansieverhuringsmark wees.
Suidkaap
Die aanvraag na eiendomme groei in die ganse Suidkaap en Terblanche Eiendomme ondervind dat dorpe soos Albertinia, binne maklike pendelafstand van Mosselbaai, 'n ongekende oplewing in die eiendomsmark beleef. "Mosselbaai is slegs 52km van Albertinia en baie mense verkies die plattelandse lewenskwaliteit. Met die koms van Internet word selfs internasionale besighede daarvandaan bedryf," sê Okkie.
Benewens die opbloei in Albertinia se eiendomsmark, word 'n baie positiewe jaar-op-jaar groei in die eiendomsbedryf in die res van die groter Mosselbaai ondervind.
ARTIKEL: NICKEY LE ROUX, MOSSEL BAY ADVERTISER-JOERNALIS
'Ons bring jou die nuutste Tuinroete, Klein-Karoo, Hessequa nuus'
