PLETTENBERGBAAI NUUS - Jaguars-rugbyklub het hul onoorwonne tuisrekord behou toe hulle Albertinia Rangers verlede Saterdag met 54-23 in 'n opwindende SWD Eerste Liga A-wedstryd by Neverland-stadion oorrompel het.
Die tuisspan het van die afskop af hul voornemens duidelik gemaak en binne die eerste 15 minute twee keer gaan druk.
Heelagter Masakhane Sithole en die gevaarlike skrumskakel Roshe 'Punte' Harris het albei die doellyn oorgesteek om Jaguars vroeg met 12-0 voor te laat loop.
Albertinia het egter nie teruggestaan nie en het in die 20ste minuut met 'n verdoelde drie die agterstand tot vyf punte verklein. Jaguars het daarna beheer van die wedstryd begin neem.
Die ervare flank Bramwel Felix het met sy terugkeer tot aksie ná 'n besering onmiddellik sy stempel afgedruk toe hy in die 30ste minuut vir 'n verdoelde drie gaan druk het. Abrian Willemse het daarna 'n strafdoel bygevoeg voordat Mabhelandile Ngcelwane met 'n indrukwekkende drie die voorsprong verder uitgebrei het.
Albertinia het kort voor rustyd nog drie punte aangeteken, maar Jaguars het steeds met 'n gerieflike 27-13 voorsprong gaan water drink.
Die tuisspan het ná rustyd op hul momentum voortgebou. Willemse het vroeg nog 'n strafdoel oorgeskop voordat vleuel Lucion Meyer in die hoek gaan druk het om die telling tot 35-13 te rek.
Albertinia het hard geveg om hul pad terug in die wedstryd in te kry, maar hul taak is bemoeilik toe Willemse 'n aanval onderskep en 55 meter gehardloop het vir 'n skitterende drie wat Jaguars se voorsprong verder gerek het.
Die besoekers het steeds karakter getoon en met twee vinnige drieë die agterstand tot 40-23 verklein. Enige hoop op 'n terugvegpoging is egter kort daarna beëindig toe slot Tebogo Moloi sy krag gewys het met nog 'n Jaguars-drie.
Die wedstryd is op gepaste wyse afgesluit toe die tuisspan laat in die ontmoeting met 'n strafdrie beloon is om 'n oortuigende 54-23 oorwinning te beklink.
Willemse was een van die uitblinkers met 17 punte danksy 'n drie, drie doelskoppe en twee strafdoele. Verdere drieë het gekom van Sithole, Harris, Felix, Ngcelwane, Meyer en Moloi.
Voorwedstryd
In die voorwedstryd het Albertinia Rangers wel iets gehad om oor te glimlag toe hulle die botoon gevoer het met 'n 32-15 oorwinning teen Jaguars se B-span.
'n Opgewonde Jaguars-ondersteuner, Shereen Barnado, het ná die wedstryd haar trots uitgespreek.
"Ons het geweet die manne gaan dit vandag doen. Hulle speel uitstekende rugby en ek is 'n trotse, lojale ondersteuner. Die voorspelers het veral van voor gelei en die afrigter doen ongelooflike goeie werk," het sy gesê.
Jaguars se volgende uitdaging is 'n wegwedstryd teen Eagle Stars. Die klub, wie se klubhuis sy elektrisiteit kwyt is weens kabeldiefstal ná die verwoestende storm van ongeveer drie weke gelede, hoop om voor die wedstryd weer normaal te kan oefen.
‘We bring you the latest Garden Route, Hessequa, Karoo news’
