SUID-KAAP NUUS - `n Opwindende nuwe krieketkompetisie, die Afrika T20-beker is Dinsdag deur Krieket Suid-Afrika geloods.
Die SWD krieketspan, met hul hoofkwartier op Oudtshoorn, sal in groep D van die kompetisie teen Vrystaat, Gauteng en Kenia meeding.
Drie nasionale spanne, Zimbabwe, Kenia en Namibië sal saam met 12 plaaslike franchise-spanne in die kompetisie, wat van 4 September tot 4 Oktober sal plaasvind in aksie wees.
Die toernooi word in `n formaat soortgelyk aan die Wêreldbeker gespeel met die wenner van elke groep wat na die semi-finale en finale kan vorder.
Met die bekendstelling het Haroon Lorgat, hoofuitvoerende beampte van Krieket SA, die toernooi beskryf as `n "opwinde nuwe ontwikkeling wat geleentheid aan die begin van die seisoen bied om te kompeteer maar ook fondse te genereer. Ons is opgewonde om `n Afrika-krieketkompetisie te ontwikkel."
Met die naderende IKR se Twintig20 Wêreldbeker, bied die kompetisie ook geleentheid vir spelers om vroeg reeds hul merk te maak.
SuperSport bied ook regstreekse dekking van die kompetisie, insluitende die halfeind- en eindstryde.
Die voormalige Protea-snelbouler, Makhaya Ntini, sal dien as ambassadeur vir die kompetisie.
'Ons bring jou die nuutste Tuinroete, Klein-Karoo, Hessequa nuus'
