Die 19-jarige meisie tas verward in haar geheue rond, op soek na antwoorde na ’n beweerde verkragting in die vroeë oggendure van Saterdag 9 Julie.
Trane het in haar groot bruin oë opgedam, terwyl sy probeer onthou het, maar in haar gedagtes het die donker gat geen antwoorde nie.
Sy kan net die gebeure voor sy net na middernag ‘weggeraak’ het, onthou.
“Ek en ’n vriend is na ’n braai na ’n gewilde nagklub toe. Daar het ons by ’n tafel gesit en ek het ’n paar slukkies van ’n Savanna gedrink,” het sy vertel. Sy onthou hoe sy en haar vriend, wat ook anoniem gehou word, gaan dans het en hoe sy na die dans na hul tafel teruggekeer het.
