SUID-KAAP NUUS - Die George Oumotorskou, gedrewe deur Oakhurst Versekeringsmaatskappy Beperk, vier sy 21ste bestaansjaar op 11 en 12 Februarie.
"Tydens hierdie jaarlikse geleentheid van die Suid-Kaap Oumotorklub gaan die George Oumotorskou se 21ste bestaansjaar gevier word met 'n uitstalling van sowat
1 000 voertuie," sê Phillip Rosser, voorsitter van die reëlingskomitee van die 2017 skou. Na verwagting sal 2016 se rekordgetal besoekers van 12 000 oorskry word.
Die besoekers, wat vanoor die hele land na die Suid-Kaap stroom om die een van die grootste oumotorskoue in die land by te woon, sal nie teleurgesteld wees nie. Vanjaar se spesiale uitstalling fokus op voertuie met 'n Duitse handelsmerk en altesaam 35 unieke voertuie vorm deel van die uitstalling.
Vanjaar is 'n 1886 Benz Patent Motorwagen die uniekste voertuig in die uitstalling. "Dit is die eerste voertuig wat met 'n binnebrandenjin toegerus is," vertel Kobus Harris, president van die Suid-Kaap Oumotorklub, wat sedert 1983 Duitse motors versamel.
"Die replika is een van slegs tien replikas wêreldwyd en behoort aan die Mercedes-Benz SA-fabriek in Oos-Londen."
Mercedes-Benz SA vervaardig sedert 1955 ook voertuie in Suid-Afrika. Die W121, 190 Sedan, wat op 31 Januarie 1958 voltooi is, was die eerste voertuig wat hier vervaardig is.
"Benz, die voorlopers in ontwikkeling van voertuie, het vinnig nog modelle ontwikkel en gebou en ander vervaardigers het gevolg," vertel Harris, wat ook die Mercedes-Benz-fabriek in Duitsland besoek het. Tans word slegs die C-klas Mercedes-Benz hier gebou.
Twee van Harris se eie voertuie wat deel vorm van die uitstalling, naamlik sy rooi 1960 Mercedes-Benz 190 SL sportmotor en sy maroen 1959 Mercedes-Benz 220 S Sedan.
Ander spesiale Benz-modelle is 'n 1901 Benz "Ideal" wat van Kaapstad af kom. Dr Waldo Scribante, president van die Mercedes-Benz Klub SA en entoesiastiese versamelaar van George, stal ook drie van sy voertuie uit, naamlik 'n 1913 Benz, 'n 1935 Mercedes-Benz 130H en 'n 1938 Mercedes-Benz 320.
Volkswagen is nog 'n Duitse vervaardiger wie se voertuie deel vorm van die uitstalling. "Ons het die Auto Pavillion Volkswagen Museum op Uitenhage gevra om deel te wees van die Duitse uitstalling. Hulle bring twee Volkswagen Beetles wat dateer uit 1949 en 1979. Die 1979-model is die laaste een wat in Uitenhage vervaardig is."
BMW is ook teenwoordig met twee modelle wat onderskeidelik uit 1936 en 1938 dateer. 'n 1938 DKW en 'n 1935 Opel Cabriolet vorm ook deel van die spesiale uitstalling.
Oakhurst Versekeringsmaatskappy Beperk is vir die tweede jaar aan boord. "Die George Oumotorskou, is sekerlik een van die grootste jaarlikse geleenthede in die ganse Wes-Kaap," sê Peter Grindlay, besturende direkteur van dié versekeringsmaatskappy.
"Omdat ons ingestel is op die gesin en veral voertuie, is dit vir ons 'n vreugde om weer deel te neem." Dié maatskappy stel vanjaar 'n nuwe versekeringsproduk vir klassieke voertuie tydens die skou bekend.
Melvin Naik, George se uitvoerende burgemeester, het tydens die bekendstelling van die 2017 George Oumotorskou in November verlede jaar, die George Munisipaliteit se voortgesette betrokkenheid by die skou bevestig. "Ons wil graag verhoudings met die George Oumotorskou smee met die doel om ook ander geleenthede te ontgin."
Ander hoogtepunte van die skou is 'n uitstalling van sowat 5 000 modelmotortjies. Benewens die uitstalling van kosbare privaatversamelings sal daar ook modelmotortjies te koop aangebied word.
Vanjaar se Veteraantoer, wat op 10 Februarie plaasvind, vertrek vanuit Uniondale en eindig die Vrydagmiddag by die skouterrein. Voertuie vanoor die land neem deel aan die toer wat een van die hoogtepunte vir versamelaars is wat elke geleentheid aangryp om met hul veteraanmotors te toer.
Nog 'n hoogtepunt is 'n promosierit deur Thembalethu en Pacaltsdorp op Saterdag 5 Februarie. 'n Groep ou motors, vergesel deur die klub se brandweerwa, ry deur die woonbuurte terwyl die omroeper Herman Ungerer die skou in Afrikaans, Engels en Xhosa die skou bekendstel.
Naas die uitstallings sal die SAB biertent, bestuur deur George Rotariërs, en verskeie stalletjies wat eet- en drinkgoed verkoop die innerlike verkwik. Jong kinders sal teen 'n geringe fooi onder toesig by 'n veilige speelplek besig gehou word.
Die George Oumotorskou vind plaas by die PW Botha Kollege in Yorkstraat, George. Parkering is op die skoolterrein beskikbaar.
- Saterdag: Volwassenes R50, Pensionarisse R40, Kinders R20
- Sondag: Volwassenes R20, Pensionarisse R15, Kinders R10
- Naweekpakket vir Saterdag en Sondag: Volwassenes R60, Pensionarissse R45, Kinders R25
- Hektye is Saterdag 07:00 tot 18:00 en Sondag 08:00 tot 13:00
Melvin Naik, George se uitvoerende burgemeester, neem die amptelike opening Saterdag om 10:00 waar.
'Ons bring jou die nuutste Tuinroete, Klein Karoo, Hessequa nuus'
