KNYSNA NUUS - Jong fietsryers van Knysna het die afgelope week uitstekend gevaar toe hulle die Eden-span by die Suid-Afrikaanse Jeugfietsryfees in Oudtshoorn verteenwoordig het.
Leerders van Hoërskool Knysna, Laerskool Knysna en die Knysna Sportaka-demie het medaljes ingeryg en waardevolle ervaring opgedoen teen die beste jong ryers van regoor Suid-Afrika.
Awona Mdela van Knysna Hoërskool was een van die uitblinkers met 'n goue en 'n bronsmedalje.
Knysna Laerskool se RJ van Lill het twee goue, een silwer- en een bronsmedalje gewen, terwyl Noku Thembo twee brons-medaljes ingepalm het.
By die Knysna Sportakademie het Bruwayne en Anwill Titus elk twee goue en een bronsmedalje verower.
Al die Knysna-ryers het die Eden-span verteenwoordig, wat as die algehele wenner van die jeugfees gekroon is nadat hulle die meeste punte oor al die items bymekaar gemaak het.
Die jaarlikse jeugfees is daarop gemik om jong fietsryers te ontwikkel en hulle aan die verskillende dissiplines van die sport bloot te stel. Deelnemers het oor drie dae in bergfiets-, baan-, pad- en kriteriumwedrenne meegeding.
Die eerste dag het 'n bergfietswedren en 'n XCO-item ingesluit, gevolg deur twee baanwedrenne op die Oudtshoorn-ovaalbaan. Op die tweede dag het die ryers aan padwedrenne en 'n kriteriumwedren deelgeneem.
Die slotdag het met 'n spantydtoets afgeskop, waarin gemengde spanne moes saamwerk om die vinnigste tyd aan te teken. Volgens die reëls moes 'n meisie eerste oor die wenstreep gaan. Die fees is afgesluit met padwedrenne oor afstande van 20 km en 65 km.
Volgens die afrigters het die Knysna-leerders nie net uitstekende uitslae behaal nie, maar ook waardevolle ervaring opgedoen en die geleentheid terdeë geniet.
‘Ons bring jou die nuutste Tuinroete, Hessequa, Karoo nuus’
