OUDTSHOORN NUUS - Onder leiding van die immergewilde maestro Richard Cock en saam met bekroonde Suid-Afrikaanse pianis François du Toit, is die Klassique Galakonsert vir ’n viering van geliefde meesterwerke uit die Klassieke en Romantiese tydperke.
“Ons terugkeer na Klein Karoo Klassique is geweldig opwindend. Om die geleentheid te hê om die volledige professionele simfonieorkes buite Kaapstad te hoor is redelik seldsaam, wat hierdie optrede besonders spesiaal maak.
"Gehore gaan ’n toeganklike en boeiende program hoor – of hulle nou lewenslange entoesiaste van klassieke musiek is en of hulle hul heel eerste orkesoptrede bywoon, die Galakonsert beloof ’n onvergeetlike aand,” sê Adriaan Fuchs, uitvoerende hoof en artistieke direkteur van die KFO.
Cock sê hy is opgewonde om saam met ’n groter orkes as in vorige jare by Klassique op die verhoog te wees en dat feesgangers kan uitsien na ’n program wat goed gebalanseerd is, met musiek wat meesterstukke in eie reg is.
“Die gehoor gaan met ’n opregte gevoel van vreugde wegstap na die Galakonsert. Die klavierkonsert is dramaties en die simfonie het ’n ware gevoel van vreugde en stralende selfvertroue wat aansteeklik is.”
Die program open met Mozart se sprankelende ouverture tot Le nozze di Figaro, ’n werk vol vernuf, energie en sjarme.
Daarna neem Du Toit die verhoog in vir Mozart se Klavierkonsert nr. 24 in C-mineur, K. 491, een van die komponis se mees diepsinnige en dramatiese klavierkonserte. Die Galakonsert sluit af met Mendelssohn se Simfonie nr. 4 in A-majeur, die geliefde “Italiaanse” Simfonie.
Klassique Galakonsert 2026. Foto: Richard Cock
Du Toit sien daarna uit om die verhoog met die KFO en Cock te deel. “Die KFO is vir my amper soos familie. Dit is altyd spesiaal om saam met hulle op te tree, aangesien ek reeds vir meer as 40 jaar saam met hulle optree. Richard en ek het ook ’n lang geskiedenis van samewerking en dit is wonderlik om saam met hom te werk. Ek het lanklaas Mozart se klavierkonsert uitgevoer en sien veral daarna uit,” sê hy.
“Niks vergelyk daarmee om ’n volle simfonieorkes in lewende lywe te hoor nie. Opnames kan eenvoudig nie die omvang, rykheid en krag van lewendige orkesklanke vasvang nie. Die gehoor gaan elke noot en klank ervaar – van die strykinstrumente se warmte tot die blasers se deurdringende klank en die houtblaasinstrumente se ryk klanke – terwyl hulle ook die ongelooflike samewerking tussen die verskeie musikante in die orkes as ’n eenheid gaan ervaar. Dit is ’n omvangryke belewenis wat mense lank na die laaste noot nog gaan bybly,” sê Fuchs.
Hy sê verder feeste soos Klein Karoo Klassique maak dit vir die KFO moontlik om ’n verbintenis te vorm met gehore wat nie gereeld die geleentheid het om ’n volle simfonieorkes in persoon te beleef nie.
“Feeste skep ’n unieke omgewing waar mense gereeld meer ontvanklik is om iets nuuts te ontdek. Gehore kom na feeste met ’n sin van nuuskierigheid en vir baie is ’n fees waarskynlik ook hul eerste kans om ’n volle simfonieorkes in persoon te hoor. Daardie eerste ervaring kan transformerend wees en lei gereeld tot ’n lewenslange waardering vir orkesmusiek. Feeste speel ’n belangrike rol om gehore vir klassieke musiek uit te brei en om klassieke musiek meer toeganklik te maak.”
Cock voeg by dat feeste ’n wye verskeidenheid konsertgangers lok, waarvan sommige vir ’n spesifieke rede daarheen kom, maar dan ook iets anders probeer en besef dat hulle daarvan hou.
“Dit is ’n briljante program vir ieder en elk, met wonderlike musiek. Ek lig ook die musiek toe, om dit selfs meer toeganklik te maak.”
Ten slotte sê Cock die atmosfeer op Oudtshoorn is wat dit so spesiaal maak om daar op te tree. “Alles is so naby tydens die fees: daar is goeie kos, goeie geselskap én briljante musiek. Moet dit nie misloop nie.”
Die Klassique Galakonsert vind op Vrydag 7 Augustus om 19:00 plaas in die Oudtshoorn Burgersentrum en kaartjies verkoop vinnig.
Klassique Galakonsert 2026. Foto: Francois du Toit
Klein Karoo Klassique word van Vrydag 7 tot Sondag 9 Augustus op Oudtshoorn aangebied. Die feesprogram sluit klassieke musiekuitvoerings, literatuur, kuns, kos en wyn in.
Die fees word aangebied deur die KKNK, moontlik gemaak deur die Rupert-Musiekstigting en die ATKV, met ondersteuning van Le Lude, RSG, Oudtshoorn Courant en die Oudtshoorn Munisipaliteit.
Dié winterfees se verblyfborge is Argyll B&B, Beit Shalom, Cul de Sac, De Zeekoe, Kleinplaas Holiday Resort, Miles B&B Guesthouse, Oudtshoorn Inn, Pictures Boutique Hotel, Protea Hotel Riempie Estate, Queen’s Hotel, Ravenscliff Manor, Rosenhof Country House en Thylitshia Villa.
Vir meer inligting, besoek klassique.co.za of kontak die KKNK-kantoor per e-pos by [email protected], skakel 044 203 8600 of stuur ’n WhatsApp na 065 285 2337.
‘Ons bring jou die nuutste Tuinroete, Hessequa, Karoo nuus’
