SUID-KAAP NUUS - Altesaam 12 uit die 20 wenners van kykNET Fiësta-toekennings is vanjaar by die Absa KKNK van 3 tot 11 April op Oudtshoorn te sien.
Die Fiëstas, wat jaarliks erkenning gee aan top- Afrikaanse akteurs en produksies, is Donderdag, 5 Maart by ’n glansgeleentheid in die Kunstekaap-teater in Kaapstad aangewys.
Emo Adams het twee Fiëstas ontvang vir Finding Emo as beste prestasie in ’n musiekgedrewe produksie en beste musiekproduksie. Adams het sy toekennings opgedra aan Zayn Adam wat in Februarie oorlede is. “Ek is heeltemal oorweldig. Die eerste prys het my heeltemal off guard gevang en die tweede het my kniekoppe laat bewe.”
Finding Emo het in 2014 die Kanna vir die beste musiekproduksie by die Absa KKNK gewen en Adams keer vanjaar terug na Oudtshoorn met sy nuutste musiekproduksie Emo Adams is Duidelik. Hy gaan ook aan twee groot verskeidenheidskonserte, Huisgenoot Afskop en Son Top 40 Mix Masala, deelneem.
Die wenner van die Fiësta vir die beste teaterontwerp, Jaco Bouwer, is die regisseur van die debuut drama Buite blaf die honde swart met o.a. Dawid Minnaar en Albert Pretorius, asook Na-aap, ’n eenmanstuk met De Klerk Oelofse. Pretorius is die wenner van die Fiësta vir beste akteur vir sy spel in Die seemeeu, wat by die Absa KKNK te sien is, asook Playland.
Die seemeeu spog met nog vier Fiësta-wenners: Marius Weyers wat vereer is vir lewensbydrae vir teater, Rolanda Marais wat die toekenning as die beste aktrise ontvang het (Dogma en Die seemeeu) en Christiaan Olwagen, die wenner van die Fiësta vir die beste nuwe Afrikaanse opvoering (Dogma) wat die regie van Die seemeeu behartig.
’n Verbaasde Weyers het in sy bedankingstoespraak gesê, “Ek wil begin met die woorde van Hans du Plessis. ‘Mag die Here jou binneste roer, mag soveel goedheid jou slat dat jy loop en skaam kry oor al die genade.’ Vanaand kry ek skaam oor al die genade. Skaam, skaam, skaam, maar so lekker.”
Die eerste Blou Stoel-toekenning vir ’n bydrae wat nie noodwendig in een van die bestaande kategorieë inpas nie, is toegeken aan Saartjie Botha vir haar vertaling en verwerking van Die rolbalspeler en Die seemeeu.
Die aanbieder vir die aand, Frank Opperman, het die Fiësta vir die beste solo-vertoning ontvang vir Die klaagliedere van ds. Tienie Benade waarvan daar vyf opvoerings by die Absa KKNK is.
Richard September, wenner van die Fiësta vir beste opkomende kunstenaar vir sy spel in Rondomskrik, is in April op Oudtshoorn te sien in Nat. Soos Rondomskrik, lewer Nat ook sosiale kommentaar op die lewe van ’n groep jongmense in ’n arm, agtergeblewe gemeenskap.
Lee-Ann van Rooi is bekroon met die Fiësta vir beste vroulike byspeler vir haar rol in Rondomskrik en is van 4 tot 6 April by die Absa KKNK te sien in André P. Brink se Bidsprinkaan.
Die oud-onderwyser, skrywer, digter, vertaler, blogskrywer, fotograaf, operasanger Philip de Vos, is die ontvanger van die Fiësta vir lewensbydrae vir musiek, woord en visuele kuns. De Vos is op 4 en 6 April te sien in Karnaval van die diere.
Besprekings om al dié wenners by die Absa KKNK te sien kan aanlyn by www.computicket.com gedoen word of landwyd by Computicket, Shoprite, Checkers en House & Home. Die volledige feesprogram is aanlyn by www.absakknk.co.za beskikbaar. Verblyfbesprekings kan ook aanlyn gedoen word.
Die Seemeeu
'Ons bring jou die nuutste Klein-Karoo, Tuinroete nuus'
