KNYSNA NUUS - Toe Macnita Samuel (18) haar nommer-twee kaalvoetjies op die nat pad neersit tydens die onlangse Farm Run by Geelhoutboom buite George, het sy beslis nie gedroom dat ‘n weldoener haar sou raaksien nie.
Die klein buksie van die Knysna Sekondêre Skool het op Saterdag, 29 Oktober in sagte reën onder die ander atlete uitgehardloop en was die eerste vrou oor die wenstreep in die 10 km-wedloop.
Toevallig was Just Water Southern Cape een van die die waterborge by die geleentheid en kon bestuurder Duan Jonker nie sy oë glo toe die fyn meisietjie verby hom woerts sonder hardloopskoene nie.
Dit het hom bygebly en terug op kantoor, het die bestuur saamgespan om Macnita uit te rus met sportdrag, hardloopskoene en ‘n reënbaadjie. Haar afrigter, Heinrich Philander, het haar verlede week een middag ná skool spesiaal George toe geneem vir die inkopietog.
Philander rig Macnita nou al amper vyf jaar af en sê sy “is so ‘n bietjie lui, maar met harde werk kan sy baie ver kom”.
Volgens Macnita was haar pa ook ‘n padatleet. “En ek hardloop self al van geboorte af,” sê sy.
“Ek doen cross country ook, maar ek is nie lief om op gras te hardloop nie. Ek hou meer van die pad, hoewel ek niks hou van oefen nie; dis harde werk. Maar hierdie nuwe tekkies… Ek dink ek gaan my personal best hardloop met hulle!”
Om ná skool al die pad George toe te ry van Knysna af, was oor en oor die moeite werd vir Macnita Samuels wat deur Just Water Southern Cape verras is met ‘n spoggerige paar Asics-hardloopskoene, sportdrag en ‘n reënbaadjie. Hier is sy, hoogs in haar skik, saam met (van links) Just Water SC bestuurder Duan Jonker, haar afrigter Heinrich Philander en Just Water verkoopsverteenwoordiger Samantha September tydens die inkopietog by SportsCentre.
'Ons bring jou die nuutste Knysna, Tuinroete nuus'
