KNYSNA NUUS - Minute voor John Marcus sy laaste asem op Saterdag, 12 Julie uitgeblaas het, was sy stiefseun Brandon Beckett verbaas om 'n 'gesig' van sy pa te sien waar hy glimlaggend in die hoek van die slaapkamer staan.

Sy vrou Miranda Marcus lyk nie soos 'n vrou wat vir dae nie geslaap het nie en boonop 'n begrafnis moes reël waar daar voorsiening gemaak is vir meer as 300 roubeklaers wat van heinde en verre gekom het om hul laaste respek aan haar man, 'Broeder' Marcus te betoon.

'n Groot skare mense het sy begrafnis op Saterdag, 26 Julie by die St. James Anglikaanse Kerk in Hornlee bygewoon, waar beide sy seuns, Tashwil Marcus (27) en Beckett (21), sowel as verskeie ander sprekers vertel het watter karaktervolle persoon John. was - sy liefde vir sy medemens, sy toewyding om die armlastiges in hul gemeenskap te bedien en kospakkies af te lewer, sowel as watter grapjas hy was en sy vurige ondersteuning van die All Blacks-rugbyspan.

Miranda Marcus sê, "Ek is kalm, ja, maar met tye oorweldig 'n diep hartseer my. Tog voel ek getroos deur wat my seun (Beckett) gesien het en ook die feit dat my man verlede jaar Jesaja 54 op die nommerplaat van sy nuwe kar laat aanbring het. As ek nou daaroor dink, besef ek hy was reeds besig om my voor te berei."

Miranda vertel dat John haar seun, wat vir 'n kort vakansie van sy studies by die huis was, gebel het om 'n rugbywedstryd saam met hom te kom kyk.

"Hy was nogal ernstig dat Brandon [Beckett] moet huis toe kom en het gesê hulle manne kyk mos altyd dié wedstryde saam."
Beckett het huis toegekom en hy en sy stiefpa het die Stormers-wedstryd saam lê en kyk in 'n slaapkamer. Later sou Beckett vertel dat, terwyl hulle nog die rugby geniet en sy pa hard tekere gegaan het om sy span te ondersteun, het hy skielik van 'n 'teenwoordigheid' bewus geword.

"Dit was asof hy 'n verandering in die atmosfeer aangevoel het," vertel Miranda saaklik. "En toe sien hy maar hier staan sy pa dan nou skielik in die hoek van die kamer en hy gee hierdie groot, breë glimlag! Toe Brandon sy kop draai om te kyk hoe dit dan moontlik is want sy pa is dan hier langs hom, toe is dit wat John se liggaam begin sukkel."

Beckett, wat verpleërsopleiding in Worcester ontvang, het onmiddellik besef dat sy pa in ernstige nood verkeer en het na sy ma geroep. John was vir jare lank 'n diabeet en het ook neuropatie ontwikel weens sy gevorderde suikersiekte. Gevolglik het hy dikwels verstik of in asemnood verkeer. Dit was weens John se agteruitgaande gesondheid dat hy sy loopbaan in die polisiemag moes opgee.

Beckett het eers die Heimlich-greep uitgevoer en daarna het hy en sy ma sy stiefpa op die vloer gesit om mond-tot-mond asemhaling te probeer terwyl die ambulans ook ontbied is. Alhoewel die paramedici binne minute op die toneel was en 25 minute lank gespook het om John weer by te bring, kon hulle nie daarin slaag nie.

Tydens die emosiebelaaide begrafnisdiens het een van die sprekers erken dat 'Broeder' Marcus aan hom gesê het dat hy wéét dat hy 'n vinnige dood sou sterf en dat hy daarop voorbereid was.

Knysna SAPD kommunikasiebeampte, Sersant Chris Spies, het namens die plaaslike polisie hul diepste meegevoel aan die Marcus-gesin en familie uitgespreek. Volgens hom het A.O. John Marcus op 24 Januarie 1984 by die polisie aangesluit en is hy eerstens in Caledon gestasioneer, maar later daardie jaar na Knysna oorgeplaas. In 1988 is hy as speurder aangestel en in 2001 het hy in die misdaadinligtingskantoor begin werk. Volgens Spies is hy met die volgende medaljes vereer: die Suid-Afrikaanse Polisiemedalje vir getroue diens, vir die 75ste herdenking, vir 20 jaar getroue diens, asook die Tien Jaar Gedenkmedalje.

"Gedurende sy loopbaan het hy 'n groot bydrae gemaak tot die bekamping van misdaad en ons wil graag sy gesin bedank dat hulle hom vir ons en die gemeenskap van Knysna 'geleen' het," het Spies gesê.

Miranda en haar man het onlangs 'n vakansie in Namibië geniet, iets wat hulle al vir 'n leeftyd graag saam wou doen. Knysna se burgemeester, Georlene Wolmarans, het ook die begrafnis bygewoon want John was haar neef aan moederskant. Twee van sy broers, Trevor Marcus van Atlantis en Jean Marcus van Grabouw, het Knysna toe gekom om afskeid te neem. Ongelukkig was Trevor te siek om die begrafnis self by te woon. Sommige mense kon hul oë nie glo toe Jean Marcus die bedankings doen nie, want dit was so goed asof oorlede John Marcus selfs besig was om almal aan die lag te kry - dié twee broers is byna identities!

John Marcus laat sy vrou, Miranda, sy twee seuns, sy dogter Jody (19) en sy geliefde skootbrak, Lollies, agter.

Sien fotogalery

Lees 'n vorige artikel.

ARTIKEL: ANOESCHKA VON MECK, KNYSNA-PLETT HERALD-JOERNALIS

'Ons bring jou die nuutste Knysna, Tuinroete nuus'

Read more about: john marcus dood begrafnis polisieman