Haar stem en haar laggie het op my gedagtes kom lê. Leë gevoel om te dink, ek gaan nooit weer 'n surprise oproep uit Berlyn van haar kry nie - soms was dit bitter laat in die aand.
Ek het jou begrafnis gemis, Sigrun Ster Paschke. Ek het my woorde versamel in die holtes van my arms, en vir jou styf teen my lyf gehou.
Ek is so jammer, dat jy nie meer hier is nie. Ek wil probeer, soos ek eenkeer op jou trekklavier probeer speel het, om 'n paar note uit te kry. Ek wil jou só vashou met woorde.
Julle plaashuis met die wit Pirenese-berghonde, jy wat soos 'n jong kind wild vooruit hardloop, hande die hele wêreld vol. Want hierdie is jou plek, jy sien alles. Dit was my eerste kuier by jou in gr. 10. Ons het ons eie likeur gemaak, in jou ma se blender. Met ysies en alles. Toe ek jou slaaptyd vra: "Gaan jy dan nie die lig afsit nie?" moes ons lag. Want hoe moes jy weet dit is aan?
Ek wil by jou weet, hoe voel dit om nie te kan sien nie? Jy sê ek moet my hand ophou, en probeer om uit my hand te kyk. "Dit voel so."
Jy is gebore met 'n ster wat jou ouers se kar agtervolg het, al die pad van die hospitaal. Jy was ook my ster, wat ek gevolg het … in my tenger tienerjare van rondfoeter. Sonder 'n gidshond.
Ek het vir jou kerse gekoop vir jou verjaarsdag. En te laat besef, wierook sou 'n beter opsie wees. Maar jy was mal oor jou geskenk.
Ster, jy het my vertel van die hamsters wat jy by Worcester se skool ingesmokkel het, en hoe julle die knaagdiertjies moes vang wanneer hulle wegraak. Jy was vreesloos. Ons het saam verdwaal in die Kaap, en moes kilometers ver terugstap na die Groentemarkplein, met die hulp van wildvreemdelinge.
En die vreemdste van alles: ons het 'n konneksie gehad, sonder dat ons besef het. My oom het die spesiale tikmasjien help ontwerp waarop jy in die klas getik het.
Ster, ons het stories geskryf by UWK se slypskool, en stories gemaak so ver soos ons gaan. Ons kon so lekker lag vir ander se pretensies. "Michella," hoor ek jou. "Wat maak jy daar in George?" Jou oupa, 'n voormalige landsleier, het vir jare in Wildernis gebly.
Ek mis jou, Ster. Jy het my gelei.
'n CD met haar komposisies. Multi-instrumentalis met 'perfect pitch'.
Met haar trekklavier.
Pianis van formaat.
Sigrun (regs) en Corinne, 'n vriendin van Berlyn.
‘Ons bring jou die nuutste Tuinroete, Hessequa, Karoo nuus’
