Knysna-Plett Herald | Mediaverklaring. Volgens wie?

Translate to:


News	Classifieds	Directory

Mediaverklaring. Volgens wie?
08:28 (GMT+2), Thu, 07 June 2012

Daar is 'n nuwe gonswoord waarmee elke jan rap en sy maat probeer om blootstelling in koerante te kry - Mediaverklaring. Dit is ongelooflik hoeveel "mediaverklarings" in 'n week in my INBOX (verskoning aan die taalpuriste, maar die erkende Afrikaanse woord ontgaan my) beland.

Van Gertjie wat op 40 'n splinternuwe CD oor sy ewigdurende liefde vir sy skoolkys verklaar tot groepe wat aannames maak en klippe gooi na ander groepe tot inwoners wat verontreg voel oor een en ander wat iemand oor hulle kwytgeraak het stuur mediaverklarings uit. Ek mag verkeerd wees, maar ek was altyd onder die indruk dat 'n mediaverklaring iets is wat aan die media uitgestuur word wat die breë publiek inlig oor nuuswaardighede.

Dalk kom ek van die verkeerde planeet af, maar om 'n brief van 'n ontstoke inwoner of 'n debuutsaniksanger se nuwe CD wat met pappa se skenking van R40 000 opgeneem is of die bekendstelling van 'n nuwe modelagentskap vir kinders onder ses aan die pers te stuur as mediaverklarings grens aan die absurde.

As ek kyk na die grootste persentasie "mediaverklarings" wat ons ontvang is dit niks anders as advertensies nie. Die werklike mediaverklarings word uitgereik deur instansies wat die mense inlig en nie deur iemand wat iets wil verkoop of wil bors skoonmaak nie.

Terwyl ek op dreef is, vergun my nog 'n paar reëls om sommer iets te sê oor mense wat namens die pers besluit wat is nuuswaardig en wat is objektiwiteit. Enige koerant is altyd op soek na nuus en enige bydrae word altyd met ope arms verwelkom, maar die redaksiespan van 'n koerant bepaal die nuuswaardigheid en die objektiwiteit van die inligting.

Daar is 'n mooi latynse uitdrukking audi alterem parte wat vra dat alle partye se menings gegee word en ongelukkig is dit so dat mense dan soms vreeslik opgewonde raak as hulle eie mening deur 'n ander een weerspreek word, die koerant se plig is dan nie om onbepaald betrokke te raak by strydende partye nie.