Knysna-Plett Herald | Driejaarplan vir Landbouskou

Translate to:


News	Classifieds	Directory

Driejaarplan vir Landbouskou
14:35 (GMT+2), Tue, 31 July 2012

Willie Ward, sameroeper van die pluimveeafdeling wat vanjaar 'n duiweafdeling insluit.

SUID-KAAP NUUS - 'n Nuutgekose skouraad van die George-skou, onder leiding van die president, Gert Pretorius het 'n driejaarplan in werking gestel om die landbouafdelings by die skou terug te kry en uit te brei.

Weens veranderde denkrigtings onder organiseerders oor die afgelope paar jaar, het die landbousektor se aandeel in die plaaslike skou al hoe kleiner geword. "Beëindiging van borgskappe en gepaardgaande tekort aan fondse het die George-skou op die randjie van bankrotskap laat draai," het Pretorius gesê.

Die nuwe skouraad is egter positief oor die vordering wat reeds gemaak is om landbou weer sy regmatige plek by die skou te gee. George sal eersdaags weer dié landbouskou van ouds wees, het hy gesê.

Die skou vind vanjaar plaas van 16 tot 18 Augustus by die skougronde, die eiendom van die Outeniqua-skouraad.
Vleisbeeste is vanjaar met mening terug ná 'n lang afwesigheid. Die Suid-Kaap Simmentaler-kampioenskappe word hier gehou en onder leiding van Leon van Rooyen (tel: 082 3353094) word beoog om meer as 80 beeste en agt verskillende rasse tydens interras-kampioenskappe ten toon te stel.

Die suiwelafdeling, onder beheer van Gerhard Lenferna (tel: 083 628 4937) bied vanjaar die Jersey-streekskampioenskap aan en daar word meer as 40 uitgesoekte melkbeeste ten toon gestel. Die vooruitsig vir die oprigting van 'n melkmasjien en die voorsiening van vars melk aan skougangers is ook in die pyplyn.

Carl Opperman, hoof- uitvoerende beampte van Agri Wes-Kaap, tree Vrydagmiddag by die beesring op as spreker.

Jeugskou
Jurie Wessels (tel: 082 333 6646) bedryf die Jeuskou wat leerders die geleentheid bied om deel te neem aan landbouverwante aktiwiteite.

Skape
In die kleinvee-afdeling sorg Pieter Aucamp van BKB (tel: 082 825 3890) dat daar hierdie jaar sowat 100 skape vertoon sal word. Belangstellendes kan die SA Vleismerino- en Dohne Merinokudde-evaluering en 'n BKB-skaapskeerdemonstrasie bywoon.

Willie Ward (tel: 072 905 5858) reël jaarliks die pluimveeuitstalling. Minstens 12 verskillende hoendervariëteite sal besigtig kan word. 'n Nuutjie gaan die betrokkenheid van die duiwe wees, soos die Birmingham Rollers en wedvlugduiwe.

Ruiterkunsproewe
Die Oostelike Saalperd-subunie kies jaarliks drie skoue in die provinsie waar voornemende Protea-ruiters, aan ESSASA se ruiterkunsproewe kan deelneem. Daar word ook 'n klubskou vir die Oostelike Provinsie Saalperd-subunie aangebied. Dennis Schley is die perdesameroeper (tel: 082 881 3306).

Uitstallings
Daar sal onder meer uitstallings te sien wees van die Polaris-veldvoertuig, voerbakke, besproeiingspype, 4x4-plaasfietse, hoëdrukspuite, die proefplaas en ander toerusting.

Mense wat wil uitstal in die landbou-, industriële of ander afdelings, kan Susan Willemse, die stalletjiekoördineerder kontak by 082 881 3305.

Nasionale verskaffers soos Bell, Barloworld, New Holland en Parmalat is genader om weer deel te wees van die landbou-uitstallings en plaaslike instansies soos onder andere Haddad, Kubota, Butlers Cheese en vele ander is vriendelik genooi om hul landbouprodukte ten toon te stel.