Knysna-Plett Herald | Kleinboer lei Afrika landbouverenigings

Translate to:


News	Classifieds	Directory

Kleinboer lei Afrika landbouverenigings
10:15 (GMT+2), Tue, 26 June 2012

LANDBOU NUUS - Op die webtuiste www.landbou.com is onlangs berig dat geskiedenis gemaak is toe 'n kleinboer van Malawi pas as voorsitter van die Suider-Afrikaanse Konfederasie van Landbouverenigings (SACAU) verkies is.

Felix Jumbe, voorsitter van die Malawi-boerevereniging, wat op kleinboere fokus, is die eerste kleinboer wat in die 20 jaar lange bestaan van die organisasie tot voorsitter verkies word.

Jumbe sê tydens sy termyn wil hy veral op die volhoubaarheid van die boer op grondvlak fokus.

"Maak die boer geld uit wat hy of sy doen? Dít is wat saak maak en dit is wat ons organisasie sal uitbou."

Volgens Felix wil hy ook op die versterking van boere-organisasies in die 12 lidlande van SACAU konsentreer. "Ons sal kyk na die volhoubaarheid van nasionale boereverenigings. As die nasionale organisasies nie in staat is om hulle lande se beleide te beïnvloed nie, sal dit nie vir SACAU moontlik wees om sy doelwitte vir die streek te bereik nie."

Die hoof uitvoerende beampte van SACAU, Ishmael Sunga sê, Jumbe se verkiesing kan samewerking tussen kleinboere en kommersiële boere verbeter - wat een van sy organisasie se doelwitte is.

Nóg 'n doelwit vir die organisasie is om 'n landboufonds - wat kleinboere kan help om hulself te vestig, na te vors en daar te stel.

Felix vervang Douglas Taylor-Freeme, voorsitter van die Commercial Farmers' Union (CFU) van Zimbabwe as voorsitter van SACAU.