AGRI NUUS - “Vir volhoubare voedselproduksie en optimale hulpbronbenutting het ons ’n grondhervormingsmodel nodig waardeur ’n simbiotiese verhouding tussen suksesvolle kommersiële boere en nuwe toetreders, sowel as kleinskaalse boere, ontwikkel kan word," het Johannes Möller, president van Agri SA, by ’n vergadering van die World Farmers’ Organisation wat op 7 Junie 2012 in Rome gehou is, gesê.
“Dit is nie net ’n mentorskapsverhouding nie, maar hoofsaaklik ’n sakeverhouding,” het hy gesê en aspekte soos produksiebeplanning, kollektiewe insetverkryging, ontplooiing van toerusting en bemarking is ‘n toenemend uitdagende funksie in terme van logistiek en nakoming van gesondheids- en kosveiligheidsvereistes.
In antwoord op hierdie opmerkings het verskeie Afrika-boere die relevansie van so ’n benadering vir hulle lande gesteun. Mnr Nduati Kariuki van die Kenya National Federation of Agricultural Producers het gesê dat Afrika-regerings, multi-laterale instansies en skenkers die strewe van Afrika-boere om suksesvolle grootskaalse kommersiële produsente te word, moet erken. “Die fokus moet dus verskuif van die volhouding van ‘n kleinskaalse-produsentbedeling na die bemagtiging van boere om effektiewe deelnemers in die kommersiële voedselketting te word,” het hy gesê.
Daar word van Afrika-lande verwag om hulle voedselproduksie aansienlik uit te brei, nie net om aan die plaaslike vereistes te voldoen nie, maar ook aan dié van ’n groeiende wêreldbevolking. “Dit is duidelik dat die bewese kundigheid en die oorgrote meerderheid van ’n groot aantal gevestigde kommersiële boere ’n onontbeerlike bate vir Suid-Afrika is om die sukseskoers vir nuwe toetreders tot die landbou en, in ’n mindere mate, ook aan landbou-ontwikkeling in Afrika te verbeter,” het Möller gesê.
Uitgereik deur Agri SA, Direktoraat: Korporatiewe Skakeling.
|